同朋友去旅行，完全係人性大考驗。
所謂相見好同住難，有時同一大班朋友去旅行搞唔好，唔單止會中途嘈交面左左，返到香港可能連朋友都無得做（自己就曾經有過親身經歷🤦🏻♀️）。我估我最怕同以下嘅人去旅行：
1. 口不對心
去旅行之前完全唔input行程又話無所謂，去到又要嫌三嫌四，”食呢間好咩?”，” 搭咁耐車就係睇呢啲石頭呀?”，”呢個outlet都無乜嘢買嘅？”...真係DLLM。
2. 乜都唔食
如果你去韓國唔食辣，去日本唔食魚生，去泰國唔食海鮮都唔緊要，有啲人身體狀況接受唔到我係明白嘅，咁最多分開order。最怕有啲人餐餐要食好西，去夜市掃街又要投訴污糟；又或者去東南亞地區又話要食西餐鋸扒，真係搞你唔掂。
3. 零時間觀念
嗰啲朝早唔肯起身又要用三個鐘頭梳洗；又或者分開行3點集合，永遠3點半先到嘅人類們，唔該同我拉去打靶。
4. 賴皮獸
住Airbnb得一個廁所，第一日就已經平均安排好所有人嘅沖涼次序，然後有啲人總會側側膊唔多覺又話頭痛又話唔舒服要沖涼先，讓咗佢之後又見到佢沖完涼喺床度打機。
5. 有早知無乞衣
有種人平時咩都唔理，唔幫手搵路唔幫手check開門時間唔理搭咩交通工具，然後一有少少阻滯就加鹽加醋：“一早話咗...”呢個時候好想一巴車埋去。
6. 要成村人陪嘅自私撚
當大家已經環球片場咗一整日，食完飯想返酒店休息準備聽日，唔知點解實有人精力充沛未夠喉，又話要再行夜市，或者堅持要去當地酒吧飲酒。其實真係無所謂，想去嘅咪去想返酒店休息嘅咪返去囉，然後佢對住想走嘅人彈一句” 我覺得全部人一齊去開心啲囉”...唔...我都想回佢一句我覺得全部人一齊返酒店休息開心啲囉。
7. 黑面神
話明黑面神，就係一唔順佢意就會立即黑你面，嬲爆爆又要唔出聲又要行最後，同佢講因為路面塞車唔搭的士，最好就咁行去目的地，然後佢會狠狠答你：行咪行囉，你鍾意啦。好想即刻問候佢屋企人呀 🤗
8. 帶住少爺公主病去旅行
大家都有父母生，大家都有手有腳，點解我要幫你拎行李又要讓位俾你座；最燥係成日po啲得你自己靚，而我永遠未ready反晒白眼嘅相上social media...well，就讓我們絕交吧！
遇到好嘅旅伴，會令你哋嘅友誼更親近；唔適合嘅旅伴只會令大家反目成仇最後仲做唔返朋友。我自己就好慶幸可以搵到同自己去旅行嘅朋友，我覺得互相遷就同體諒係非常重要。
希望你哋都能夠遇到啦！
#非常慶幸遇到這班多毛 #已經準備緊第三次旅行 #友情大考驗 #女人像鹽
Search